રેખા ફળી છે ક્યાં..?
હથેળી ખોલીને તું જો, બધી રેખા ફળી છે ક્યાં?
લખાઈ એટલી વાતો કદી સાચી પડી છે ક્યાં?
અચાનક કોઈ આવ્યું ને, વ્યથા છોડી ગયું કેવી..!
ભરેલી લાગણીઓને વરસવાની ઘડી છે ક્યાં?
સમાવ્યું એટલું ભરચક, કે છલકાયું દરદ આંખે,
રગેરગમાં ફરે છે જે, એ પીડાને ગણી છે ક્યાં?
સમય, સંજોગથી પર તો કશું હોતું નથી અંતે,
છતાં વરસો પછી પણ જો, લીટી લમણે પડી છે ક્યાં?
ભરીને ડૂમો બેઠું જે, અજાણ્યું કોઈ વાદળ છે,
જરા વરસી જુએ થોડું, પછી ઓળખ નવી છે ક્યાં?
(લગાગાગા લગાગાગા લગાગાગા લગાગાગા)
સુનીલ શાહ